Græn lán
Lánasjóður sveitarfélaga býður sveitarfélögum og félögum í þeirra eigu upp á græn lán til umhverfisvænna verkefna. Tilgangurinn er að gera sveitarfélögum kleift að leggja sitt af mörkum til umhverfisverndar og sporna gegn loftslagsbreytingum. Leiðin að markmiðinu er að hrinda af stað verkefnum sem hafa umhverfisbætandi áhrif og að þau séu framkvæmd á þann hátt sem stuðlar að umhverfisvernd.
Ferli grænna lánveitinga:
Umsókn og fylgigögn
Verkefnin þurfa að uppfylla ákveðnar formkröfur sem settar eru fram í grænni umgjörð sjóðsins og skila þarf inn fylgigögnum með útreikningum. Verkefnin þurfa að vera vel útlistuð, ákveðnar greiningar þarf að framkvæma og útreikningar á umhverfisábata þurfa að liggja fyrir.
Mat á verkefni
Lánastjóri og framkvæmdastjóri fara yfir upplýsingarnar og fylgigögn og skera úr um hvort verkefnin uppfylli græna umgjörð Lánasjóðs sveitarfélaga. Verkefnin þurfa að hafa mælanleg jákvæð umhverfisáhrif. Sérfræðingur í umhverfismálum er kallaður til við yfirferð á gögnum þegar þess gerist þörf.
Upplýsingagjöf sveitarfélags
Sveitarfélög þurfa í framhaldinu að upplýsa Lánasjóðinn reglulega um þá mælikvarða sem tilheyra verkefninu og þann umhverfisábata sem verður til.
Framvinduskýrsla
Lánasjóðurinn gefur árlega út framvinduskýrslu grænna skuldabréfa samhliða ársreikningi þar sem fjárfestar fá viðeigandi upplýsingar, m.a. yfirlit yfir fjármögnuð græn verkefni og jákvæð umhverfisáhrif þeirra.
Lánasjóðurinn ásamt sérfræðingi í umhverfismálum hefur tekið saman helstu umhverfismælikvarða sem líta skal til í tilteknum verkefnum. Græna umgjörðin byggist á umhverfisstefnu sjóðsins.
Næstu skref í lántökuferlinu:
- Sjáðu kjör grænna lána (LSS 40 GB) á síðunni lánaframboð og lánakjör og reiknaðu greiðsluáætlun í lánareiknivél sjóðsins.
- Kynntu þér umsóknarferlið.