Þróunarbanki Evrópuráðsins

Lánasjóðurinn hefur á undanförnum árum sótt lánsfé hjá Þróunarbanka Evrópuráðsins (CEB) í evrum til allt að 15 ára til verkefna á vegum sveitarfélaganna sem stuðla að bættum lífsgæðum íbúa.

Þróunarbanki Evrópuráðsins í París (CEB) var stofnaður árið 1956 af nokkrum löndum innan Evrópuráðsins og er Ísland einn af átta stofnaðilum bankans. Aðilar að bankanum eru nú 43 ríki. Bankinn hefur fyrst og fremst félagsleg markmið; upphaflega var hlutverk hans að fjármagna félagslegt íbúðarhúsnæði og aðra uppbyggingu til að styðja við flóttafólk og heimilislaust fólk í Evrópu eftir seinni heimsstyrjöldina. Síðustu ár hefur CEB einnig lagt mikla áherslu á að fjármagna umhverfisbætandi og sjálfbærniverkefni.

Sjá nánar á vef bankans: www.coebank.org

Helstu skilmálar og lánsheimildir hjá CEB:

CEB hefur hæsta mögulega lánshæfismat (AAA) frá helstu lánshæfismatsfyrirtækjum og býður upp á lántökukostnað sem liggur nokkuð undir millibankavöxtum.
Lán eru almennt veitt til allt að 15 ára og eru lánuð út í evrum.
Kostnaður heildarverkefnis má ekki fara umfram 20 milljónir evra og hlutur CEB í verkefninu má ekki vera umfram 50% af áætluðum kostnaði.

Útlán CEB skiptast í þrjá meginmálaflokka:

Smelltu á flokkana hér að neðan til að sjá nánari upplýsingar um hvaða verkefni falla undir þá:

Menntun

Bygging skóla og tengdra íþrótta- og menningarmannvirkja
Húsnæði fyrir nemendur
Breytingar á skólahúsnæði til að auðvelda aðgengi
Bygging og endurbætur á verknámshúsnæði
Annar sambærilegur kostnaður

Bætt lífsskilyrði í þéttbýli og dreifbýli

Til að falla undir þennan flokk verða lánsbeiðnir að berast frá sveitarfélögum þar sem íbúafækkun hefur átt sér stað eða þar sem skortur er á grunninnviðum. Ef þéttbýlissveitarfélag sækir um lán er skilyrði að sveitarfélagið sé hlutfallslega fámennt eða á svæði þar sem landbúnaður, skógrækt eða sjávarútvegur er ríkjandi.

Í þessum tilvikum lánar CEB til eftirfarandi verkefna:

Þróun og skipulag landssvæðis
Veitufyrirtæki: vatnsveitur, rafveitur, fráveitur og úrvinnslustöðvar
Gatnagerð og viðhald gatna
Innanbæjarsamgöngur á dreifbýlisstöðum
Grunnaðstaða fyrir skóla og heilsugæslu
Félagslegir samverustaðir eins og íþrótta- og leikvellir, útivistarsvæði, bókasöfn og kvikmyndahús
Aðrir sambærilegir innviðir

Umhverfisvernd

Minnkun og vinnsla úrgangs
Hreinsun og verndun grunnvatns
Að draga úr mengun jarðvegs og jarðvegslaga
Hljóðeinangrun og varnir gegn mengun
Framleiðsla á endurnýjanlegri orku
Orkusparandi verkefni í mannvirkjum
Minnkun á loftmengun
Verndun og þróun líffjölbreytni
Hreinni samgöngur
Aðrir umhverfisbætandi þættir

Framkvæmd og eftirlit

Lán til fjármálastofnana eins og Lánasjóðs sveitarfélaga eru yfirleitt svokölluð Multi-project lán. Það felur í sér að Lánasjóðurinn tekur að láni ákveðna fjárhæð og þarf innan 18 mánaða að skila skýrslu til CEB um notkun lánsfjárins og gera grein fyrir þeim verkefnum sem fjármögnuð voru með endurlánafé bankans.

Það er því mikilvægt að þau sveitarfélög sem fá úthlutað láni úr þessum flokki haldi utan um verkefnið í samræmi við kröfur CEB, sem krefst upplýsinga um kostnaðaráætlanir, útboðsvinnslu, tímaramma framkvæmda og samanburð á raunkostnaði við áætlanir.

← Til baka í Lánaframboð og lánakjör