Eftirfarandi er samantekt á helstu efnisatriðum útlánareglna Lánsjóðs sveitarfélaga:
----------------------------------
Megintilgangur Lánasjóðs sveitarfélaga er að tryggja íslenskum sveitarfélögum, stofnunum þeirra og fyrirtækjum lánsfé á hagstæðum kjörum með veitingu lána eða ábyrgða.
Lánasjóðurinn getur eingöngu lánað íslenskum sveitarfélögum, stofnunum þeirra og fyrirtækjum. Skilyrði fyrir því að hann veiti lán til fyrirtækja og stofnana sveitarfélaga er að þau séu að öllu leyti í eigu sveitarfélaga eða sveitarfélaga og ríkissjóðs sem beri ábyrgð á skuldbindingum þeirra gagnvart sjóðnum. Einnig er það meginkrafa lánasjóðsins að sveitarfélög setji tekjur sínar að veði fyrir lántökum hjá sjóðnum og fyrir ábyrgðum sem það veitir vegna lántöku fyrirtækis eða stofnunar í þess eigu að fullu eða að hluta.
Sjóðurinn hefur einungis heimild til að lána til verkefna sem hafa almenna efnahagslega þýðingu, sem þýðir að verkefnið má ekki vera í samkeppnisrekstri. Dæmi um verkefni sem sjóðurinn hefur lánað til eru:
- Skólar (leikskólar, grunnskólar, tónlistarskólar).
- Dvalarheimili.
- Félagsheimili.
- Gatnagerð.
- Hafnarframkvæmdir.
- Veituframkvæmdir.
- Sundlaugar og önnur íþróttamannvirki.
- Ennfremur hefur lánasjóðurinn komið að fjárhagslegri endurskipulagningu sveitarfélaga.
Lán til fyrirtækja og stofnana í eigu fleiri sveitarfélaga takmarkast við ákvæði í 6. mgr. 73. gr. sveitarstjórnarlaga um ábyrgðir sveitarfélaga sem eru túlkuð þannig að eingöngu sé heimilað að veita ábyrgðir vegna framkvæmda, meiriháttar viðhaldsframkvæmda eða endurfjármögnunar á lánum sem sannanlega hafa verið notuð til slíkra framkvæmda.
Megin efnisatriði samþykktra útlánaregla lánasjóðsins eru eftirfarandi:
Við mat á lánshæfi sveitarfélaga skal horfa til skuldsetningar sveitarfélaga og getu þeirra til að standast þær skuldbindingar. Skuldsetning viðkomandi sveitarfélags byggist á heildarskuldastöðu í hlutfalli við heildartekjur. Slíkt mat skal kynna fyrir stjórn, eigi sjaldnar en einu sinni á ári og skal mat á hverju sveitarfélagi uppfært áður en lánsumsókn er afgreidd eða tekin til umræðu í stjórn. Matið skal á hverjum tíma byggt á nýjustu aðgengilegu gögnum. Miða skal við allar skuldir A og B-hluta ásamt þeim skuldbindingum utan efnahags sem til eru komnar vegna verkefna sem venjulega mynda skuld á efnahag. Í því skyni á að leita eftir upplýsingum um slík verkefni og ætlaða skuldastöðu vegna þeirra til að gæta jafnræðis við samanburð á milli sveitarfélaga. Skuldir og tekjur vegna orkufyrirtækja skulu undanþegnar þegar verið er að meta stöðuna. Óreglulegir tekjuliðir skulu einnig undanskildir, s.s. söluhagnaður eigna og/eða tekjur af lóðasölu.
Framkvæmdastjóri sjóðsins hefur heimild til að veita sveitarfélögum lán ef skuldsetning þeirra, að teknu tilliti til lánveitingar, er undir 125% skv. nánari reglum.
Lán til sveitarfélaga með skuldsetningu á bilinu 125% til 250% þarf ávallt að afgreiða af stjórn LS.Almennt skal ekki lána sveitarfélögum með skuldsetningu yfir 250% nema sveitarfélagið hafi gert samning um fjárhagslega endurskipulagningu við eftirlitsnefnd um fjármál sveitarfélaga með aðkomu LS. Við sérstakar aðstæður er stjórn heimilt að samþykkja lán til sveitarfélaga með skuldsetningu yfir 250% ef andvirði lánsins rennur til greiðslu afborgana og vaxta hjá sjóðnum.
Til leiðbeiningar fyrir lántakendur eru hér yfirlit yfir útborgunarskilyrði sem er yfirlit yfir þau gögn sem þurfa að liggja fyrir áður en útborgun á láni getur farið fram og ennfremur tillaga að bókun í fundargerð sveitarstjórnar annars vegar og hins vegar bókun stjórnar félags eða stofnunar í eigu sveitarfélags, sem taka má af netinu og aðlaga að skilyrðum einstakara lántakenda. Fyrir sveitarstjórnir eru sýndir fjórir valmöguleikar eftir því hvort um er að ræða (i) lántöku, (ii) sjálfskuldarábyrgð vegna lántöku félags í eigu sveitarfélags, (iii) einfalda ábyrgð vegna lántöku félags í eigu fleiri sveitarfélaga eða (iv) veðsetningu tekna vegna lántöku byggðasamlags.
